Masaligon si Senador Risa Hontiveros nga mabutyag na ang kamatuoran kung kinsa ang gitumbok nga ‘big boss’ o utok sa lapad nga kurapsyon nga nahitabo dihang miigo ang COVID-19 sa tibook Pilipinas.
Miingon si Hontiveros nga ang pagkasikop ni kanhi Procurement Service-Department of Budget Management o PS-DBM head ug Atty Lloyd Christopher Lao, nagtimaan nga duna pay hustisya batok sa ilegal nga pagamit sa salapi sa katawhan, nga unang gimanipular sa pipila ka tawo, ug sila lang ang nabulahan.
Gihimo sa senador ang pahayag gamit ang iyang social media sa Meta ug natapos kini nga wala niya nganli kung kinsa ang iyang gidudahan nga ‘big boss’ ni Lao.
Kahinumduman nga ubos sa Duterte Aministration ang panahon sa pag-igo sa pandemya sa COVID-19, diin lakip sa gikuwestiyon sa misuse of public funds si former DoH Sec Francisco Duque III ug kanhi Pres Rodrigo Duterte sa kanhi Senate Blue Ribbon Committee nga hawid ni Richard Dick Gordon.
Lakip sa gikuwestiyon ang mga sobra ka mahal nga personal protective equipments, face masks ug uban pa nga gibaligya sa kontobersyal nga kompanyang Pharmally.(Bombo Anne Quileste).
