Mikabat sa kapin 8,265 ka mga pamilya ang napugos nga mi-evacuate sa syudad sa Gingoog human sa pag-agi sa Bagyong Basyang sa rehiyon.
Sumala ni Gingoog City CDRRMD Head Marlon Pajo, gilangkoban kini sa 29,272 ka mga indibidwal nga gikan sa 33 ka barangay, nga gipahimutang sa 39 ka evacuation centers sa tibuok syudad.
Butyag ni Pajo, bisan pa sa kadaghan sa mga evacuee, minimal lamang ang structural damage nga natala sa Gingoog City, lakip ang pipila ka mga balay nga natumbahan sa mga punoan sa kahoy apan wala gyud’y totally damaged nga panimalay.
Mapasalamaton usab si Pajo nga wala kaayo naapektuhan ang syudad, ug dako kaayong tabang nga nauna na ang force evacuation bisan wala pa magsugod ang pinakakusog nga epekto sa bagyo.
Matod pa niya, wala na sila maghulat nga magkinahanglan pa og rescue una pa ipagawas ang mga residente, tungod kay giuna na ang pagpahimangno base sa weather forecast.
Sa pagkakaron, nakabalik na sa ilang mga panimalay ang mga residente, ug normal na usab ang operasyon sa mga opisina sa syudad, human mopahunong ang epekto sa bagyo.
