CAGAYAN DE ORO CITY – Lusot na sa boto nga 12 nga pabor batok upat lang ang nagsupak nga tugtan sa konseho si City Mayor Rolando ‘Klarex’ Uy nga makig-pirmahay na sa halos 3 bilyones pesos nga yuta nga paliton sa city govt ngadto sa pamilyang Cid aron tukuran sa bag-ong city hall sa Brgy Canitoan sa syudad.
Kini human gipangayua’g pagtugot ang gipalabang nga resolusyon ni Kag. Edgar Cabanlas sa ilang sesyon sa konseho kagahapon sa hapon.
Tungod niini,dili na madugay ug mahatagan na sa katumanan ang pagbaton sa luag nga city hall human uyuni sa Land Bank of the Philippines ang pagpangutang sa maong salapi.
Samtang gi-depensa sa panig sa oposisyon kon nganong supak sila sa pagtugot nga gihatag sa konseho pakig-pirmahay ni Uy sa binayaray sa yuta ngadto sa pamilyang Cid balor 2.7 bilyones pesos.
Miingon si Kag. Jose Pepe Abbu Jr nga dili klaro kon gi-aprobahan na ba sa bangko ang giutang sa dakbayan alang sa maong katuyuan.
Kini ang rason nga hugot gibarugan sa panig sa oposisyon ang ilang pag-reserba sa ilang pagsupak aron mas maklaro ang gisudlang pagpangutang sa city hall diin katawhan ang magpas-an sa bayrunon sa sunod nga katuigan.
Apan alang usab kang City Councilor Imee Moreno, overpriced ang pagpalit sa yuta kay tukuran sa bag-ong building sa city hall ning syudad.
Kini ang gipamugos usab ni Moreno kon nganong kuyog siya sa ubang mga konsehal nga gusto’g sihag nga pagsusi sa gisudlan nga pagpangutang aron magbaton sa bag-ong lokasyon sa city hall.
Namahayag si Moreno nga gusto nila masuta ang nalatid nga kasabutan sa maong pagpangutang tali sa syudad ug bangko nagpahulam sa maong pondo.
Samtang nagsilbi na lang nga formality ang pagtuki sa konseho kabahin sa billion peso transaction loan sa tali sa city govt ug bangko aron matugtan makautang pangpalit sa yuta sa bag-ong itukod nga city hall.
Kini ang depensa ni Cabanlas nunot sa pagsupak sa pipila ka konsehal sa gipalabang nga katugutan sa local executive dept nga makigpirmahay ug makigbinayranay sa yuta nga tukuran sa city hall.
Hisayrang unang natukod ang city hall nga kanhi gitawag nga Casa Real de Cagayan sa tuig 1831 pa.
