CAGAYAN DE ORO CITY -Kolektahon sa buhatan sa tresurero ang binilyong buhis nga pakyas gibayad sa mga dagkong kompanya nga nakabase sa kauluhan apan dunay business operations ning syudad.
Kini human unang nadiskobrehan sa komitiba sa trade and commerce nga gipanguluhan ni Kag George Goking ang paglikay bayad sa maong mga kompanya sa panudlanan sa syudad.
Tungod niini,ipatawag pagbalik ni Goking ang mga representante sa maong wala una hinganli nga mga kompanya aron pangutan-on kon kanus-a ang tukma nga bayran nila ang dili mominus 10 ngadto dul-ag 15 bilyon pesos nga buhis alang sa syudad.
Samtang makigkoordinar ang Oro Chambers of Commerce-Cagayan de Oro ngadto na kang City Councilor George Goking sa pagsuta kon unsa nga mga kompaniya ang wala gabayad sa ensaktong buhis sa syudad.
Miingon si Oro Chamber of Commerce Public Relations Officer Atty Antonio Soriano nga andam sila motabang sa pagpaningil ug kolekta sa buhis alang sa koleksyon sa syudad.
Dugang ni Soriano nga mahinungdanon ang pagbayad sa buhis tungod kay mao kini ang gamiton nga pondo sa mga proyekto sa lokal nga kagamhanan sa syudad.
