CAGAYAN DE ORO CITY – Gikalipay sa pamilya ug mga kabanay sa gipatay nga si late MR.CAGAYAN DE ORO candidate Adrian Rovic Fornillos nga temporaryo nang nabalhog sa city jail si Lapasan Baptist Church Bishop Dimver Andales ning syudad.
Kini ang pagbutyag ekslusibo sa Bombo Radyo sa amahan nga si Benz Llenas nunot sa pagmando ni RTC Branch 39 Presiding Judge Marites Bernales nga dakpon si Andales tungod sa kasong murder.
Miingon si Llenas nga nakuhaa’g gamay nga kabug-at ang ilang pagbati kay nakita nila nga nagsugod na’g ligid ang balaod aron pagkab-ot sa hustisya alang sa biktima.
Si Fornillos ang gipusil-patay sa tricab in tandem suspects gamit ang kalibre 45 nga armas sa ulo samtang dunay gidalikyatan sa Brgy Nazareth sa May 9 sa gabii.
Samtang mosang-at sa petition for bail o piyansa si Andales sa korte alang sa iyang temporaryong kagawasan sa prisuhan.
Miingon ang iyang abogado nga si Atty Rhobert Maestre nga sulayan nila’g hangyo ang korte bisan kon walay piyansa nga gimando sa kasong murder batok sa ilang kliyente.
Siya miingon nga pabiling inosente pa ang ilang kliyente batok sa kaso ug pamatood niini,wala mosibat si Andales dihang gisilbi sa kapolisan ang warrant of arrest batok kaniya sa sulod sa ilang simbahan sa miaging Lunes sa buntag.
