CAGAYAN DE ORO CITY-Gikompirmar ni Tandag City Bishop elect Fr Raul Dael nga namiligro ang iyang kinabuhi tungod sa mga nadawat niini nga bahad gikan sa mga tawong nasuko batok kaniya.
Kini may kalabutan sa aktibo nga partisipasyon ni Dael sa kampanya kontra illegal nga droga nga prioridad nga programa ni Pres Rodrigo Duterte.
Si Dael ang kabahin sa nagtabang paghatag giya ug pag-atiman sa mga tawong biktima sa gidiling droga pinaagi sa anti-drugs recovery program sa simbahan.
Hinoon,wala na gi-detalye ni Dael kon kinsa ang mga tawo nga nagtinguha sa iyang kinabuhi kay dili niya gusto mobati’g kahadlok ang katawhan.
Si Dael kinsa Doctor of Divinity o DD ang mag-25 ka tuig nang pari ug ordinahan pagka-obispo sa San Agustin Cathedral ning syudad sa Hunyo 7 ning tuiga.
Samtang andam na ang kapolisan paghatag seguridad sa ordinasyon pagka-obispo ni Dael dinhi sa syudad.
Kini human anaa na sa 90 porsiento ang kaandam sa seguridad aron mohatag seguridad kang Dael ingon man sa tulo ka cardinals,gatusang kaparian ug 4-mil ka bisita sa maong kalihukan.
Miingon si Supt Mardi Hortillosa,tigpamaba sa Cagayan de Oro City Police Office o COCPO nga ika-garantiya nila nga dili mabalda ang ordinasyon ni Dael kinsa madestino sa Diocese of Tandag City,Surigao del Sur.
