PC:CdeO’s CIO
CAGAYAN DE ORO CITY-Emosyonal nga gidawat ni Bishop Raul Dael, DD ang tahas nga gisangon kaniya ni Santo Papa Francisco alang sa ebanghelisasyon sa simbahang Katolika.
Kini human panguluhi ni Manila Archdiocese Jose Luis Cardinal Tagle ang episcopal ordination ni Dael sa Saint Augustine Metropolitan Cathedral ning syudad kaganihang buntag.
Miingon si Dael nga natandog pag-ayo kini sa gitahas kaniya sa Ginoo aron panguluhan ang katawhan sa bag-ong tahas sa Tandag City sa Surigao del Sur sugod ning adlawa.
Gisaksihan sa libuang parokyano, govt officials, cardinals, 40 ka obispo ug gatusang kaparian ang ordinasyon ni Dael sa San Agustin Cathedral kaganihang buntag.
Gikalipay usab sa pamilya ug kabanay sa bag-ong obispo ang gihatag nga tahas ngadto kaniya.
Kini human personal nga misaksi ang kabanay ni Dael nga si Dario Dael Rojo nga mi-biyahe pa sakay sa motorsiklo gikan sa Davao City aron lamang makasaksi sa kalihukan sa San Augstine Cathedral.
Miingon si Rojo nga saksi siya kon unsa ka buotan si Dael samtang sila mga bata pa sa lungsod sa Jasaan, Misamis Oriental sa miaging katuigan.
