CAGAYAN DE ORO CITY, Philippines – Hulipan ni Luka Doncic gikan sa Dallas Mavericks, si Los Angeles Lakers Star player Anthony Davis alang sa ipatuman nga makakurat ug blockbuster trade sa duha ka team.
Makauban ni Doncic sila Maxi Kleber ug Markieff Morris padulong sa Lakers, samtang si Davis ug Max Christie ang musulod sa Dallas.
Segun sa usa ka NBA insider, gihulatan nalang ang pag-aprubar sa trading gikan sa kadagkuan sa NBA. Kuyog sa maong trade ang team sa Utah Jazz nga gitakdang mudwat kang Jalen Hood-Schifino ug duha pa ka draft picks padulong sa ilang team.
Hisayran nga mihungaw ang gibansagang “blockbuster trading” human nadag-an sa Lakers ang ilang match up tali New York Knicks, bisan wala ang presensya ni Davis sa korte, gumikan sa iyang abdominal injury.
Mahinumduman nga sukad sa adlaw sa Pasko, wala makita sa korte si Doncic tungod sa iyang calf strain, ug hangtud sa pagkutlo ning balita, wala pa gihapon kini gipadula sa Mavericks.
Hisayran nga pinaagi sa maong trade, mas mukusog pa ang tsansa sa Lakers nga mukampeon sa bag-ong NBA Season, tungod sa line-up nila LeBron James ug Doncic sa Lakers.
Samtang si Davis mahimo nang maka-uban si Kyrie Irving sa Dallas.
Una nang mibati sa kakurat ang mihungaw nga impormasyon ug daghan ang nagpangutana kung unsa ang rason sa “blockbuster trading” tali sa Lakers, Dallas, ug Utah Jazz
