Gisaway sa House Prosecution Panel ang gihulga ni Bise Presidente Sara Duterte nga “blood bath” sa hearing sa iyang impeachment.
Namahayag si Atty. Antonio Audie Bucoy, tigpamaba sa House prosecution panel, nga “bubble bath” ang gilandingan sa hulga ni VP Duterte, human namahayag ang iyang defense team nga ibasura ang pagdungog sa kaso, sukwahi sa iyang kagustuhan.
Gisaway sa kongreso ang “Answer ad cautelam” sa bise kay gilikayan niini ang pagtubag sa isyu sa pagwaldas sa confidential ug intelligence funds sulod lang sa pipila ka adlaw, samtang nagsilbing kalihim sa Department of Education, (DepEd), ug mikomentaryo lamang sa pag-refer sa Commission on Audit o COA-Findings.
Giakusahan usab kini nga wala mutubag sa mga alegasyon nga peke ang mga liquidation documents ug peke ang mga ngalan sa mga benepisyaryo.
Gumikan niini, ang prosecution panel, misupak sa hangyo ni Duterte nga ibasura ang impeachment case, ug ilang gi-insistir nga ang proseso sa impeachment legal ug balido, tungod kay kini gisang-at ug giendorso sa kapin usa ka katulo o 1/3 sa mga miyembro sa House of Representatives.
Busa, giingon ni Bucoy nga walay laing angay buhaton kundili ipadayon ang sa Senado ang hearing sa kaso ni Duterte.
