Gikataw-an na lang ni Misamis Oriental Provincial Board Member Dexter Yasay ang mga pahayag ni Misamis Oriental Governor Juliette Uy atol sa flag ceremony niadtong Lunes, diin napunting ang iyang ngalan ug ni Board Member Romel Maslog nga giakusahan og pagdaot sa administrasyon pinaagi sa isyu sa mining sa probinsya.
Sa iyang interbyu sa Bombo Radyo, gibutyag ni Yasay nga wala na niya masabti kung ang kapitolyo probinsyal nagpadayon pa ba nga kapitolyo o nahimo na bang merkado.
Bisan pa sa pulong sa gobernadora nga walay kooperasyon ang sangguniang panlalawigan, giingon ni Yasay nga gidawat nila ang patutsada sa gobernadora.
Gikatingala usab niya nganong naapil siya sa nahisgutan atol sa flag ceremony, tungod kay ang iyang gibuhat mao lamang ang pagsugyot og mga solusyon aron hatagan og katin-awan ang giingong illegal mining nga nahitabo sa lungsod sa Initao.
Naghinaot si Yasay nga mahatagan na og kahupayan ang maong isyu ug mapanubag ang nakalapas sa balaod sa illegal nga pagminana, kay ang mga katawhan matod pa mao ang napihig sa maong sitwasyon.
