CAGAYAN DE ORO CITY-Nagtoo si Vice Gov Joey Pelaez nga pagpangdaut lamang sa iyang pangalan ang akusasyon ni Misamis Oriental board member Fredrick Kho may kalabutan sa “ghost employees”.
Siya miingon nga gipaluyohan sa pulitika nga ilang kaatbang ang maong akusasyon.
Una nang gimanduan ni Pelaez ang tanang empleyado sa Sangguniang Panlalawigan nga makig-koordinar sa Commission on Audit o COA sunod semana aron i-presentar ang ilang mga dokumento nga magmatood nga dili sila ghost employees.
Giangkon ni Kho nga adunay gasugo kaniya aron ibulgar ang isyu may kalabutan sa ghost employees.
Apan gitin-aw niini nga ang katawhan sa Misamis Oriental maoy gasugo kaniya nga ibulgar ang maong isyu.
Gani, nalipay siya tungod kay daghan ang nagsuporta kaniya sa maong akusasyon.
Una nang giangkon ni Kho nga gi-base lamang niya sa ‘hearsay’ o tsismis ang iyang previlege speech sa ‘ghost employees’ sa miaging semana.
