CAGAYAN DE ORO CITY-Padayon pang giimbestigahan sa mga personahe sa Bureau of Fire Protection ang hinungdan sa dakong sunog sa Zone 4, Sta Cruz, Tagoloan Misamis Oriental kaganinang buntag.
Maoy nasunog ang gipa-rentahang boarding house ni Elsa Eguilos; junkshop nga gipanag-iyahan ni Rodrigo Alboro ug bodega ni Eugene Unabia.
Sumala pa ni BFP-Tagoloan investigator F03 Jonie Ben Echeveria nga posibleng may kalabutan sa napasagdan nga paggamit sa kuryente ang hinungdan sa sunog.
Anaa sa P150,000 ang structural damage sa maong sunog.
Nagsugod sa kwarto sa usa ka boarder ang kalayo hinungdan sa dakong sunog.
Kini ang gibutyag sa caretaker sa boarding house ni Elsa Eguilos nga si Jonathan Bustalic.
Sumala pa ni Bustalic nga posibleng wala maibot nga charger sulod sa gi-abangan nga kwarto ang hinungdan sa pagdilaab sa kalayo.
Hisayran nga ang maong boarding house ang nagbaton og 13 ka kwarto.
Walay kasayuran si Eguilos nga nagsumikad sa ilang area ang kalayo hinungdan sa pag-ulbo sa sunog.
Matud ni Eguilos nga natingala lamang siya kay nagkagubot ang mga tawo gawas sa iyang gipa-rentahan nga panimalay.
Asoy pa niini nga tungod sa firewall, wala na mikuyanap pa sa laing panimalay ang kalayo gawas lang sa junkshop nga lakip nasunog.
Gibasol usab sa tag-iya sa junkshop nga si Alboro ang hinay nga responde sa mga bombero hinungdan nga nahurot kaugdaw ang tanan niyang scrap materials.
Si Alboro miingon nga ilang gisulayan nga palongon ang kalayo gamit ang fire extinguisher apan paspas gihapon ang pagkaylap sa kalayo tungod sa mga ligid ug uban pang light materials.
Dugang pa ni Alboro nga halos tanang gamit niya sa junkshop ang nahurot og lamoy sa kalayo.
