CAGAYAN DE ORO CITY- Gikompirmar ni Regional Drugs Enforcement Unit o RDEU operative Police Staff Sgt Elmer Arrabi Jr nga supplier sa droga sa Misamis Oriental ug Cagayan de Oro City ang duha ka Maranao-Muslim nga nadakpan sa joint operation sa PDEA ug kapolisan sa Purok Apitong,Brgy Maranding,Lala,Lanao del Norte.
Giila ang usa sa mga suspek nga giingong bodyguard sa usa ka pulitiko nga si Erwin Madid alyas Koykoy ug iyang higala nga si Maumar Panda, pulos residente sa Sultan Naga Dimaporo sa maong probinsiya.
Matud ni Arrabi nga dugay na nila nga gimonitor ang mga illegal nga kalihukan sa mga suspek ilabina nga sila ang gitudlo nga tinubdan sa mga unang dinakpan nga drugista.
Nakuha sa posisyon ni Madid ang 250 gramos nga gitoohang shabu nga dunay market value nga dos milyones pesos ug .38 caliber revolver samtang 400-mil nga kantidad usab nakompiska gikan kang Panda ingon man duha ka bigbikes nga gamit nila sa illegal drugs transaction.
Nagdumili una si Arrabi sa paghatag detalye kon kinsa nga pulitiko ang gi-serbisyohan ni Madid.
