Gikompirmar ni Bombo Internationa News Correspondent Rhemy Estrada Calimlim nga required na ang pagpatukod sa bombo shelter sa tanan bag-ong ipatukod nga mga gambalay sa Israel.
Si Calimlim, kinsa nagpuyo sa Haifa, miingon sa BOMBO RADYO nga ang puy-anan sa iyang amo gitukuran sa kaugalingong bombo shelter, human gimandato sa ilang gobyerno nga usa kini sa rekisitos sa pagpatugod sa puy-anan, epekto sa padayon tensyon sa Middle East.
Alang kang Calimlim ang “Mamad” o reinforced security room niadto pang tuig 1990 gipatuman apan mas gipa-istriko kini ning panahona, isip kabahin sa balaod sa ilang building code aron masiguro nga ang matag pamilya adunay accessible nga proteksyon.
Base sa nalatid sa balaod ang “mamad” kinahanglan nga lig-on ug makasugakod sa direct impact sa missile o debris.
Kinahanglan nga gama kini reinforced concrete, special steel doors, ug airtight windows aron mapugngan ang chemical o biological threats, hinungdan nga sobra ka mahal ang pagpatukod niini.
Alang kang Calimlim mukostar kini sa $20,000 o musumada sa ₱1.1 milyon.
