CAGAYAN DE ORO CITY-Naghatag kahadlok sa mga residente ang bomba nga nakita sa basurahan sa Zone 2, Brgy Patag ning syudad.
Kini human makita sa usa ka basurero ang 60mm mortar nga gibutang sa usa ka bag sa maong lugar.
Gilayon nga mi-responde ang mga personahe sa Explosives Ordnance Division o EOD ug nasuta nga wala nay sulod ang bomba human gihimong lamp shade.
Naalarma ang mga residente tungod kay adunay wirings nga nagbitay sa mortar nga gibutang sa bag.
Samtang nagpahimangno si RTA enforcer Michael Cahig sa mga residente sa syudad nga magpabilin nga magbinantayon ug mag-maigmat batok sa mga dautang elemento.
Matud ni Cahig nga dili malikayan nga adunay mga tawo nga mosakay sa panahon ilabina nga nag-atubang sa hadla sa terorismo ang syudad sama na lamang sa nakita nga 60mm mortar nga gibutang sa usa ka bag sa ilang lugar.
Hisayran nga giimbestigaran karon sa mga pulis kung kinsa ang tag-iya sa bag.
Una nang mibati’g kahadlok ang mga residente sa syudad human miggawas ang report nga nakasulod na ang ISIS bombers ug expert bomb makers sa Mindanao.
