CAGAYAN DE ORO CITY-Mo-resign sa trabaho ang station manager sa Bombo General Santos kon may ebedensiya nga gidawat niini ang bag nga giingong dunay sulod nga 5 milyon pesos sa General Santos City.
Kini ang panganti Bombo Janjan Macailing dihang sila gisikop sa NBI-PNP tungod sa giingong pagpangayo’g suburno sa founder sa Kabus Padatu-on o KAPA nga si Joel Apolinario.
Miingon si Macailing kuyog ang Bombo Salvador Galano nga nalipay sila nga nakaabot sa Malakanyang ang hitabo aron mabulgar ang tinunto sa KAPA nga giabagan sa pipila ka personahe sa PNP ug NBI aron sila ma-frame up sulod sa mall sa Gensan niadtong miaging adlaw.
Mobalik na’ programa si Macailing ug Galano sugod ning adlawa human makapiyansa sa kaso gipasaka ni Apolinario sa piskalya.
Samtang wala makatingog ang mga abogado ni KAPA founder Joel Apolinario dihang gipangayua’g public disclaimer sa Security Exchange Commission-10 kabahin sa giingong ilegal nila nga kalihukan sa Mindanao.
Kini human midalikyat ang tulo ka abogado ni Apolinario sa SEC-10 aron ipamugos nga lehitimo sila nga grupo ug gigamit lamang sa laing tawo aron sila madaut.
Miingon si SEC regional director Atty Reynato Egypto nga subay sa public advisory sa ilang central office,pabiling giila nga ilegal ang gihimo sa KAPA kay wala kini gihuptang permit sa gobierno.
Nasayran nga gisaad sa KAPA nga makuha sa mga miembro ang 30 porsiento nga return of investment gikan sa mga
donasyon nga nahatag nila.
