CAGAYAN DE ORO CITY-Subling ipahigayon sa mga nag-unang lugar sa tibook nasud nga adunay Bombo Radyo ug Star FM Stations ang Bombo Medico ilabina sa Capitol University ning syudad ugmang adlawa.
Nag-unang tumong sa Bombo Medico 2018 sa Bombo Radyo Philippines nga matunulan sa tabang medical, optikal ug dental ang mga kabus nga walay kapas sa pagpakonsulta sa mga doctor ug walay ikapalit sa tambal alang sa ilang balatian.
Sa pagkakaron, mas gilapdan pa sa Bombo Radyo Philippines ang serbisyo ug pagtabang sa mga kabus nga katawhan.
Ang simultaneous nationwide medical, dental ug optical mission, usa lamang sa daghang programa nga gimugna sa Chairman sa Bombo Radyo Philippines nga si Dr. Rogelio M. Florete, aron matabangan ang mga kabus isip kabahin sa corporate social responsibility.
Sa vision sa Chariman sa Bombo Radyo Philippines, ang network nagsilbi lamang tulay aron ang mga experto, indibidwal ug korporasyon ang makatunol sa ilang tabang ngadto sa kadaghanan.
Ang pagtabang sa mga nanginahanglan, usa ka importanteng mekanismo aron mapalambo ang panaghiusa ug pagtinabangay.
Ang laing pang duha ka proyekto sa Network nga nagbaton sa susamang tinguha mao ang Dugong Bombo nga gahimoon matag bulan sa Nobyembre.
Ang bloodletting activity, dungan gihapon nga gahimoon sa Bombo Radyo ug Star FM stations nationwide.
Samtang matag bulan sa Enero mao ang Bombo Music Festival nga gitumong sa pagpalambo sa kultura ug talento sa musika sa mga Pinoy.
Subling maka-abag sa pagtunol ug serbisyo sa Bombo Medico 2018 mao ang mga doktors, dentists, pharmacists, nurses, nursing aids, volunteers ug uban pang grupo nga moabot sa 200 ka individuals, gawas pa niini ang mga personahe sa Bombo Radyo ug Star FM sa tibook nasud.
Gawas sa medical checkup, dental ug optical services, libreng tambal ug uban pang serbisyo nga itunol sa Bombo Medico, may itunol usab nga wheelchairs, canes and crutches, eyeglasses ug dentures .
Ang mga lugar nga sentro sa Bombo Medico 2018 naglakip sa Metro Manila, Tuguegarao, Cauayan, Laoag, Vigan, La Union, Dagupan, Baguio, Naga, Legazpi, Bacolod, Iloilo, Roxas, Kalibo, Cebu, Tacloban, Davao, General Santos, Butuan, Koronadal, Cotabato, Dipolog, Cagayan de Oro ug Zamboanga City.
