CAGAYAN DE ORO CITY – All set na ang mga bangkero nga naggikan sa nagkadaiyang bahin sa Western ug Northern Mindanao regions alang sa laing hugna sa Bombo Bancarera Mindanao Circuit nga himoon sa Jaspera Beach Resort,Brgy Bonbon,Cagayan de Oro City, Agosto 28 ning tuiga.
Kini human anaa sa dili mo-ubos 40 ka bangkero nga hawod pagmaneho sa mga bangkang de motor alang sa maong kalingawan nga tinuyo gidalit sa Bombo Radyo Cagayan de Oro isip dugang lingaw sa katawhan sa pagsaulog sa kapistahan ni Sr San Agustin ugmang adlawa.
Kabahin sa mga entrante ang gikan sa Zamboanga Peninsula,Lanao del Norte,Misamis Oriental ug mismo dinhi sa dakbayan diin ilang ilogan ang katibuk-ang P100-K total cash prizes paghuman sa lumba.
Sulod sa maong lumba,ilhon nga kampeon ang bangkero nga dunay labing mubo nga minutos nga nakonsumo sa pakiglumba sa laing mga entrante.
Masakmit sa magsilbing kampeon ang premyong cash nga P30,000;balor 20-mil pesos ang 1st runner up samtang 10-mil pesos ang 2nd runner up.
Tunulan usab sa libo ka pesos ug ubang freebies ang non-placement nga mga bangkero nga apil sa kompetisyon.
Ipadala usab sa General Santos City ang mogula nga winners sa bancarera ning syudad aron mosalmot sa championship final match kauban ang mga kampeon gihapon gikan sa Bombo Radyo Davao ingon man sa Bombo Radyo Butuan sa Setyembre 1 ning tuiga.
Mas modagko pa ang premyo sa Bombo Bancarera Mindanao Circuit finals participants pag-abot sa General Santos diin idumala sa Bombo Radyo Gensan.
Dugtong niini, gipasalamatan sa Bombo Radyo ang tanang mipaabot sa suporta aron makab-ot ang laing kalampusan sa tinuig nga proyekto haom sa kapistahan ni Sr San Agustin ning syudad.
