CAGAYAN DE ORO CITY – Pagpanimalos ang nakit-an nga pinaka-motibo sa militar kon nganong gi-atake sa mga terorista ang mga sibilyan nga igo lang nagsimba sulod sa Dimaporo Gymnasium,MSU Main Campus sa Marawi City,Lanao del Sur.
Miingon si AFP chief of staff Gen Romeo Brawner Jr nga sunod-sunod ang operasyon nga gihimo sa AFP Western Mindanao Command hinungdang 14 ka sakop sa mga terorista ang ilang napatay sa Maguindanao del Sur,Basilan ug Lanao del Sur sulod ning semanaha lamang.
Apil sa napatay ang bag-ong natudlo nga emir sa Asya sa teroristang ISIS nga si Abdullah Sapal dihang natigayon ang engkuwentro sa Maguindanao del Sur.
Dugang sa heneral nga napatay usab Task Force Orion operation si Abu Sayyaf Group Leader Mudzimar Sawadjaan alyas Mundi sa Basilan kinsa utok sa Jolo Cathedral bombings sa miaging katuigan.Pinakaulahi nga napatay sa 103rd IB,Philippine Army ang Dawlah Islamiyah sub-leader nga si Jalandoni Luksadato sa Domingo sa kadlawon ayha natigayon ang MSU Marawi gymnasium bombing.
Sa pikas bahin,napugos pagpanguli sa ilang mga probinsya ang mga tinun-an sa MSU Main Campus tungod sa kahadlok epekto sa gipasusikad nga bomba sa mga terorista sulod sa Dimaporo Gymnasium sa Marawi City,Lanao del Sur.
Kini ang gikompirmar ni Lanao del Sur Gov Bombit Adiong Jr resulta sa hitabo kagahapon sa buntag.
Miingon si Adiong nga gisulayan pa nila’g hangyo ang mga estudyante nga dili una manguli kay exam day ning adlawa apan mismo ang mga opisyal sa ubang bahin sa Mindanao ang nanawag kaniya aron hatagan sa seguridad ang mga bata.
