CAGAYAN DE ORO CITY, Philippines – Gikondinar ni Israeli President Isaac Herzog ang bag-uhay pa nga pagpangatake sa Hezbollah sa gamay’ng komonidad sa Majdal Shams, Golan Heights, sakop sa teritoryo sa Israel.
Miresulta ang insidente sa pagkamatay sa mga bata nga nagdula sa soccer field.
Misaad si Presidente Herzog nga hatagan sa desenteng paglubong ang mga nakabsan ug hataga’g hustisya ang ilang kamatayon.
Gumikan sa hitabo, gi-awhag sa presidente ang IDF ug si Prime Minister Benjamin Netanyahu nga muhimo’g aksiyon sa duguang paglusob sa mga sakop ni Hezbollah Leader Secretary-General Hassan Nasrallah.
Mismo si Primo Ministro Netanyahu nang mipadayag nga gawas sa Hamas, ug Houthi Rebels, nakadawat usab sa dakung pondo ug mga armas ang Hezbollah gikan sa kagamhanan sa Iran.
Una niini, mipasalamat pa si Netanyahu kang kanhi US President Donald Trump, kay ubos sa iyang kanhi pangagamhanan, nailog sa Israel ang Golan Heights ug kini nagmalinawon.
Sa pagkutlo ning balita misaka pa sa 11 ka tawo ang patay sa lab-as nga pagpangatake sa Golan Hieghts sa militanteng pundok gikan sa Lebanon.
