CAGAYAN DE ORO CITY – Nakit-ang sad-an sa Sandiganbayan 2nd Division ang upat ka kanhi opisyales sa Cagayan de Oro Water District o COWD nga nakabase sa Corrales-Luna Streets ning syudad.
Kini human unang gikasuhan sa Ombudsman sa pagsupak sa Code of Conduct and Ethical Standards for Public Officials and Employees sila si kanhi COWD chairman Franklin Mendez,kanhi Secretary Raymundo Java,former Treasurer Sarah Borja ug assistant secretary/treasurer Sandy Bass Jr tungod sa P193 million water supply contract sa tuig 2005.
Gisilutan ang maong kanhi COWD officials human nila isibog ang ilang ‘pleas of not guilty’ sa kasong graft ug apan giangkon nga sad-an sa mas gaan nga pagsupak sa balaod sa maong transaksyon.
Tungod niini,sila gimanduan pagbayad sa tag-5mil pesos gumikan sa ilang gisudlan nga ilegal water supply contracts tali Rio Verde Water Consortium Incorporated sa maong tuig.
Gimando usab sa Sandiganbayan ang pag-release sa ilang bailbond ug giwagtang na hold departure order list nga unang gipagawas batok kanila.
Sa pagkakaron,wala pa’y komento niini ang upat ka kanhi COWD officials kabahin sa ilang hukom nga nadawat gikan sa Sandiganbayan.
