CAGAYAN DE ORO CITY – Gikompirmar sa Northern Mindanao Medical Center o NMMC nga pipila ka doktor ug medical workers ang gipaubos sa health observation.
Kini human nakasinati sa paglain sa ilang panglawas apan dili makompirmar kon sintomas sa coronavirus disease.
Miingon si NMMC chief Dr Jose Chan nga walay pili sa tawo ang virus ilabina kon ikaw usa ka health personnel.
Apan gitin-aw ni Chan nga walay angayang kabalak-an kay pipila sa mga nakasinati sa sintomas sa COVID-19 ang nagpaubos gilayon sa home quarantine ug hugot gimonitor.
Samtang giangkon usab sa Department of Health o DoH-10 nga ila nang nasubay ang mga tawo nga nakauban sa 54-anyos nga nagpositibo sa COVID-19 nga unang naka-confine sa NMMC sa syudad.
Kini pinaagi sa gipahigayon nga “contact tracing” sa ahensiya diin ilang gi-deploy ang 8 contact tracing teams.
Miingon si DOH-10 regional director Dr Adrian Subaan nga pipila sa mga gikauban sa pasyente ang naka-confine na sa ospital ug adunay nagpaubos sa home quarantine.
Apan gitin-aw niini nga ilang gipangita ang laing duha pa hinungdan nga hugot nakigkoordinar sa mga local govt units ug uban pang ahensya.
Una nang gitin-aw sa DoH nga nakuha sa pasyente ang virus didto sa kauluhan.
