CAGAYAN DE ORO CITY – Gisilbi sa Philippine Drug Enforcement Agency (PDEA-10) ang search warrant sa duha ka balay nga gipanag-iyahan sa mga anak ni Misamis Oriental Provincial Jail (MOPJ) warder Dominador Tagarda sa Barangay Carmen, ning syudad, karong buntag.
Giila ang mga suspek nga sila Von Clienton,30 anyos ug Gregorio Tagarda,35 manag-igsoon, pulos walay trabaho ug molopyo sa maong dapit.
Mi-angkon si Barangay Kagawad Vernel Taguic nga gi-enkorahe sila sa BADAC nga mupa-ubos sa drug rehabilitation human nalista ang ilang mga ngalan isip iladong drug pusher ug user sa ilang dapit.
“Planted man na sir, wala may druga sa among balay,” ingon ni Gregor.
Hinoon, mi-angkon si Gregor nga dugay na silang tigamitan sa shabu kuyog sa iyang igsoon, apan ila na kining gi-undangan human sila na minyo.
Si Gregor, 35 anyos, kanhi nagtrabaho sa Kapitolyo Probinsyal sa Misamis Oriental, ug mitrabaho sa City Hall, ning dakbayan.
Duha na ka pakete sa gitoohang shabu ang nakuha sulod sa lawak ni Gregor.
“Gikasubo naku ang ilang kahimtang apan duna man tay balaod nga angayan nilang atubangon”, ingon MOPJ warden Tagarda.
Gi-awhag sa Jail Warden ang mga batan-on nga dili awaton ang binuhatan sa iyang anak.
Mi-angkon si Tagarda nga siya mismo ang kanunay gabadlong ug namugos kanila nga mu-undang sa ilegal nga lihok sa iyang mga anak.
Gibutyag ni Tagarda nga magsilbi kining leksyon sa iyang mga anak human akto nga nakuha sa ilang duha ka managlahing balay ang mga druga.
Si Warden Tagarda, wala mag-usag puyo sa mga balay sa iyang mga anak sa Gumamela Extension, sa susamang barangay.
Ang search warrant pirmado ni Executive Judge Dennis Alcantar sa Regional Trial Court 18, Cagayan de Oro City.
