Gi-anunsyo ni United State President Donald Trump ang pag-uyon sa kadagkuan sa Iran ug Israel sa “complete and total ceasefire” human sa kapin duha ka semana nga tensyon.
Sugdan ang ceasefire sulod sa unom ka oras human sa anunsyo.
Subay sa kasabutan, ang Iran maoy unang mopahunong sa mga operasyon sulod sa 12 ka oras, ayha mosunod ang Israel sulod sa laing 12 ka oras.
Human sa 24 ka oras nga pahulay sa away, ang gubat giila nga opisyal nga natapos.
Ang tensyon nagsugod niadtong Hunyo 13, dihang miatake ang Israel sa nuclear sites sa Iran.
Gitubag kini sa Iran pinaagi sa missile strike sa US base sa Qatar, apan wala kini nakasamad sa mga Amerikano.
Ang Estados Unidos misalmot usab sa gubat pinaagi sa paghulga ug pag-atake sa pipila ka nuclear facilities sa Iran.
Sa iyang pahayag, miingon si Trump nga “ang gubat mahimong molungtad og mga tuig ug makaguba sa tibuok Middle East, apan wala kini mahitabo—ug dili gyud mahitabo.”
Bisan pa nga wala pa’y opisyal nga kumpirmasyon gikan sa Iran ug Israel, ang anunsyo giila nga dakong lakang padulong sa paghunong sa kagubot sa rehiyon.
