CAGAYAN DE ORO CITY – Gikasubo sa Philippine Military Academy (PMA) nga gipahibalo sa pamilya sa kadete nga taga- Cagayan de Oro City ang kamatayon niini samtang anaa sa training didto sa Fort Del Pilar sa Baguio City.
Kini human unang nabantayan nga nagsuka sulod sa barracks si PMA cadet Darwin Dormitorio,20 anyos sa maong lugar kagahapong adlawa.
Gibutyag ni PMA acting chief public affairs Army Maj Reynan Afan nga gisayangan sila sa kalit nga pagkawala ni Dormitorio ilabina nga nakita nila kon unsa ka maikagon nga mahimo kining sundalo.
Gisulti ni Afan nga unang nakasinati sa pagpanakit sa tiyan ug nagsuka ang biktima hinungdan gidali pagdala sa ospital aron unta masalbar ang kinabuhi niini.
Matud ni Afan nga imbestigaran nila ang gidangatan sa biktima ilabina nga nangayo’g katin-awan ang pamilya niini dihang nasayran ang iyang gidangatan.
Gitakdang dad-on ang patay’ng lawas biktima pabalik dinhi sa syudad sa oras nga andam na kini gikan sa maong kampo.
