CAGAYAN DE ORO CITY- Napatay sa kapolisan ang prime suspect pag-ambush sa convoy ni Masiu Mayor Nasser Pangandaman Jr samtang miagi sa lungsod sa Saguiran,Lanao del Sur sa miaging Nob 2019.
Giila ni Lanao del Sur Provincial Police Director Col Madzghani Mukaraam ang suspek nga si Jalaloding Moscir alyas Laluwa kinsa nalambigit usab sa daghang kaso sa pagpamatay sa maong probinsya.
Miingon si Mukaraam nga gisilbi nila ang warrant of arrest batok kang Mocsir apan misukol hinungdan nga napugos sila pag-neutralize niini.
Nagsumikad ang warrant sa kaso nga pagpatay ni Mocsir kang Safra Macabantog Pangandaman sa Marawi City sa miaging Enero 2017.
Nasuta usab nga may koneksyon ang suspek sa terror group Dawlah Islamiya-Maute Group nga gipanguluhan ni Osoph Hadji Nasif o Commander Asrap sa Lanao del Sur.
