CAGAYAN DE ORO CITY – Gisibog ni Atty Jude Sabio ang impormasyon kabahin sa kasong ‘crime against humanity’ batok kang Pres Rodrigo Duterte sa International Criminal Court o ICC sa Hague,The Netherlands.
Kini human nasabtan ni Sabio nga gigamit lamang siya nila ni detained Sen Leila de Lima,kanhi Sen Antonio Trillanes,kanhi Magdalo partylist Rep Gary Alejano ug Liberal Party aron gub-on si Duterte epekto sa anti-drugs war campaign dinhi sa nasud.
Miingon si Sabio nga ang imbento nga video ni Peter Joemel Advincula alyas Bikoy ang nakatukmod kaniya aron bawion ang iyang mga testimonya sa ICC kay mugna-mugna ra ang tanan sa mga kontra ni Duterte alang sa ilang political propaganda.
Siya miingon nga mobiyahe siya padulong sa Hague, The Netherlands aron personal nga ipahibalo si ICC Prosecutor Fatou Bensouda nga dakong bakak ang gihingusgan sa oposisyon ug angay nga ibasura na lamang.
Samtang dismayado si kanhi Magdalo partylist Rep Gary Alejano sa pagbakwi ni Sabio sa reklamong “crime against humanity” batok kang Duterte sa ICC.
Nagtoo ang kanhi magbabalaod nga adunay misteryosong nagpaluyo nga rason kon nganong kalit mitalaw si Sabio sa iyang pakigbisog nga mahataga’g hustisya ang mga namatay sa war on drugs sa Duterte administration.
Miingon si Alejano nga wala nakaya ni Sabio ang pressure hinungdan nga kalit nabag-o ang baruganan niini.
