CAGAYAN DE ORO CITY – Gibulgar ni Rafael Ragos, kanhi Prison Chief sa Bureau of Corrections ang pito ka klase sa “money making activities” sulod sa mga New Bilibid Prisons.
Base sa gisumpaang affidavit ni Ragos, kining tanan nahitabo sa tuig 2016, panahon ng milingkod si kanhi Department of Justice Secretary ug detained senator Leila de Lima.
Sa pagpangutana ni Senator Panfilo Lacson, sa nagpadayong Senate Hearing sa “GCTA for sale” gibulgar ni Ragos ang mga klase sa pagpanapi sulod sa high detention facility nga gilangkuban sa P30,000 pesos pataas nga taripa kung magpasulod sa mga guest relation officer o GRO sa kubol sa mga adunahang inmates sulod sa 24 oras; kidnapping sa mga adunahang dalaw nga gipaluyuhan sa mga nakagawas nga mga exPNP inmates; milyones nga kinitaan sa virtual casino; pangurakot sa cattering o meal allowance sa mga piniriso nga muabot sa P800,000 matag bulan; SOP collection policy alang sa mga bag-ong makasulod nga mga inmates; taripa sa pagpasulod sa imported nga bino, sigarilyo ug iligal nga druga; special request sama sa pagpapuyo sa foreigner GRO sa adunahang inmates sa ilang kubol sulod sa usa ka semana; ug request para sa party nga dunay go signal sa kalihim sa Department of Justice.
