CAGAYAN DE ORO CITY – Gikompirmar ni Valencia City Police Office Director Police Lt Col. Surki Serenias ang pagkamatay sa ilang Provincial Election Supervisor Atty Stalin Baguio sa Patag,Brgy Bagontaas, Valencia City, Bukidnon.
Miingon si Serenias nga namatay si Atty Baguio human malatayan sa dakong bato o “flying rock” ang iyang sakyanan nga puti nga Toyota Furtuner human kini magbiyahe sa maong brgy.
Gibutyag ni Serenias nga kuyog ni Baguio ang iyang kauban sa opisina apan wala kini ma-unsa tungod kay didto man midagpak ang dakong bato sa drivers seat diin milingkod ang nasampit nga opisyal sa Comelec.
Gimanhunt na sa Valencia City PNP ang truck kung asa nagsumikad ang dakung bato.
Samtang nagliso pagdawat ang grupo sa provincial election supervisors sa Commission on Elections Northern Mindanao sa kalit nga pagkamatay ni Baguio.
Miangkon si Misamis Oriental Provincial Election officer Atty Carlito Ravelo sa pakighinabi sa Bombo Radyo nga nahimo pa nilang komedyante si Baguio sa ilang ulahing meeting sa miaging semana.
Gani, nakita pa niya nga labi-labi ka malipayon si Baguio.
Gikasubo sa opisyal nga mao na kadto ang ilang ulahing adlaw sa pakig-uban kaniya.
