CAGAYAN DE ORO CITY – Gisugyot ni Kag Lordan Suan sa konseho nga imbestigaron ang pagkamatay sa bag-ong himugso nga bata sa lying-in diha sa Brgy Camaman-an ning syudad.
Kini human nagpabati sa kadismaya ang magtiayong Joel ug Rechellee Feliciano batok sa pipila ka brgy health workers ug midwife sa langan pag-atiman kanila samtang nangayo’g panabang sa miaging semana.
Miingon si Suan angayang dili palabyon sa konseho ang sitwasyon aron dili masubli nga dugay ang pag-atiman ni Gng Feliciano samtang mihimugso na sa pinakauna nila nga anak nga nakabsan sa kinabuhi.
Una nangayo’g tabang ang magtiayon nga mahatagan sa kaangayan ang kamatayon sa ilang anak.
Samtang gitahasan ni City Vice Mayor Kikang Uy ang komitiba sa panglawas nga imbestigaran ang special report ni Suan kabahin sa namatay’ng himugso nga bata sa Brgy Camaman-an ning syudad.
Kini human gi-demanda sa magtiayong Feliciano nga matabangan sila mahatagan sa kaangayan ang kamatayon sa ilang anak.
Miingon si Uy nga sila si Kag Malou Gaane ug Kag Edna Dahino kuyog si Suan ang tahasan niya sa maong imbestigasyon.
Samtang gibutyag usab ni Gaane nga may gihimo nang imbestigasyon ang city health office.
Kini may kalabutan sa BHW workers ug duha ka midwife nga gilambigit sa magtiayon kabahin sa hitabo.
