CAGAYAN DE ORO CITY – Plano ni City Mayor Oscar Moreno nga mag-issue sa ‘barangay exit pass’ ang lokal nga kagamhanan sa tanang barangay sa syudad.
Tumong niini nga mapadali ang pagsuta sa mga potensyal nga pasyente sa Covid-19 ingon man mapahugtan ang lihok sa mga residente.
Gihimo kini nga aksyon sa alkalde dihang nadugangan ang ihap sa nagpositibo sa virus nga naka-confine sa Northern Mindanao Medical Center bisan nga dili residente sa syudad.
Siya miingon nga dili angayang magkumpyansa ilabina nga nahimutang sa syudad ang referral hospital sa Covid-19 patients.
Samtang giangkon ni Moreno nga apektado siya sa mga komento sa pipila ka doktor sa syudad nga wala mahimoot sa pagpaningkamot sa gobyerno aron mabatukan ang hadla sa coronavirus disease o Covid-19.
Siya miingon nga nalooy siya sa health workers nga halos ibuhis ang ilang kinabuhi apan sawayon lamang sa pipila ka doktor gamit sa social media.
Gikasakit usab niini ang mga kritisismo nga gibato sa Department of Health ilabina kon hisgutan ang data number sa Covid-19 cases sa syudad.
Dugtong niini, nanawagan ang alkalde nga ibaliwala una ang pamulitika ug angayang magkahiusa ang tanan sa pagsumpo sa makamatay’ng bayrus.
