CAGAYAN DE ORO CITY-Pulitika ang gilantaw nga anggulo sa kapolisan sa pagpusil-patay sa Punong Barangay sa Danao, Jasaan Misamis Oriental.
Nakaangko’g duha ka igo sa ulo ang biktima nga si Alfredo Zapanta, legal age, minyo ug residente sa maong lugar.
Matud ni Jasaan Municipal Police Station commander C/Insp Rogelio Labor nga gipusil si Zapanta gamit ang .45 caliber pistol samtang namahog sa mga baboy kaganihang buntag.
Blangko pa ang mga pulis kon kinsa ang mga suspek sa krimen.
Kumbinsido ang usa sa mga residente sa nasangpit lugar nga pulitika ang motibo sa pagpusil-patay kang Kap. Zapanta.
Sumala ni alyas Toto nga nadunggan niya mismo nga nagbahad ang kaatbang ni Zapanta sa miaging piliay nga ilang buhaton ang tanan aron dili kini makalingkod sa iyang pwesto.
Dugang niini nga dakong kawad-on sa ilang barangay ang pagkawala ni Zapanta ilabina nga naila kini nga bootan ug maayo nga tawo.
Nakita sa usa ka witness ang duha ka tawo kinsa maoy responsable sa pagpamusil.
Apan, giangkon sa witness nga wala niya mailhi ang mga suspetsado tungod kay pulos kini naka-bonnet, naka-kalo ug naka-jacket sakay sa XRM nga motorsiklo.
Giangkon usab sa witness nga nahadlok siya nga doolon ang patay’ng lawas ni Zapanta human gipusil sa pagtoo nga apilon siya’g patay.
Hisayran nga bisan ang iro ni Zapanta ang kabahin sa gipusil sa mga suspek human sila gi-usig niini.
Samtang gi-awhag ni Gov Bambi Emano ang publiko nga hulaton ang kompleto nga imbestigasyon sa kapolisan sa tinood nga motibo sa pagpatay kang Zapanta.
Si Emano miingon nga dili maayo nga managhap na lamang ang mga residente sa motibo sa pagpatay sa ilang kapitan kon walay lig-ong ebidensya.
Ang pagbutang-butang sa sala maoy makadaut sa relasyon sa mga residente ug maghatag kagubot sa ilang lugar.
