CAGAYAN DE ORO CITY- Patay sa ambush ang brgy kapitan samtang pauli na gikan sa lungsod Jasaan pabalik sa lungsod sa Balingasag,Misamis Oriental kagabii.Giila ang biktima nga si Claver Miral,59 anyos brgy kapitan sa Brgy Napaliran,Balingasag ning lalawigan.
Gibutyag ni Balingasag Municipal Disaster Risk Reduction Council head Bing Sabugaa nga sakay sa motorsiklo si Miral pauli sa ilang pinuy-anan dihang gipusil kini sa wala mailang suspek nga nagsunod kaniya.
Nadala pa sa ospital ang biktima human magbaton sa mga pinusilan apan wala na makaagwanta hinungdan sa kamatayon niini.
Giiimbestigaran pa sa mga otoridad ang hitabo kon kinsa ang utok sa kremin ug unsa ang motibo niini.
Samtang nagduda ang pamilya ni Napaliran Brgy Kapitan Claver Miral nga posibleng may kalambigitan sa politika ang motibo pag-ambush patay niini sa Balingasag,Misamis Oriental kagabii.
Kini ang gibutyag sa kapikas ni Miral nga si Gng Lina Miral gumikan sa hitabo.
Miingon si Gng Miral nga gikan nagtambong sa birthday party sa usa ka kanhi politiko sa lalawigan dihang gi-ambush sa wala mailang mga suspek nga nakasakay sa motorsiklo.
Gitulisok usab ni Gng Miral ang utok sa pagpapatay sa iyang bana.
Si Miral ang ikaduha nga kapitan nga gipusil-patay sukad gipusil usab kaniadto ang brgy kapitan sa Brgy Danao,Jasaan ning lalawigan.
Samtang gilayong gihimakak sa kampo ni Balingasag Mayor Marieta Roa Abogado nga politika ang rason kon nganong gi-ambush patay si Miral kagabii.
Miingon si Abogado nga suod sila nga higala ni Miral hinungdan nasubo kini sa hitabo.
Gimando usab niini sa kapolisan ang paspas nga pag-imbestigar aron masulbad ug mahatagan sa hustisya ang gidangatan ni Miral.
Una niini,gitumok sa kapikas ni Miral nga nag-suporta ang iyang bana ngadto sa kontra ni Abogado.
