CAGAYAN DE ORO CITY – Nag-iya-iya sa pagpanghimakak sila Puntod Punong Brgy Trexie Tinampay ug Kag. Henry Dacer nga usa kanila ang miuna’g sumbag hinungdan nahitabo ang komosyon samtang sila naghimo sa ilang ika-11 nga regular session sa brgy ning syudad.
Kini human unang nagka-tensyon kay gikuwestiyon ni Dacer kon nganong paspas gi-adjourn ni Tinampay ang ilang ika-10 nga brgy session sa miaging semana.
Gikausar ni Tinampay nga giunhan kini’g sumbag rason nga mibalos siya apan wala maigo si Dacer.
Apan sa panig usab sa kagawad,namugos kini nga si Tinampay ang unang misumbag sa iyang kilid hinungdang gipaulanan niya kini’g mga kinomo.
Samtang pulos nanganti si Tinampay ug Dacer nga moduso sila’g kasong kriminal sa piskalya batok sa matag-usa kanila.
Kini human sila nag-akusar nga managsama sila nga nangasumbagan gumikan sa ilang init nga komosyon.
Namahayag si Dacer nga wala siya malisang sa bahad ni Tinampay nga moduso’g kaso batok kaniya.
Samtang nangayo usab sa pasaylo si Tinampay sa publiko tungod sa dili maayong pana-awon sa ilang brgy sesyon sa miaging adlaw’ng Lunes.
