CAGAYAN DE ORO CITY – Gipangtangtang sa Office of the Ombudsman sa ilang katungdanan ang punong barangay ingon man ang duha ka kagawad ug lakip ang chairman sa Sangguniang Kabataan (SK).
Gilakip usab pagpapha sa katungdanan ang sangguniang barangay secretary gumikan sa kasong administratibo nga gipasaka sa ilang mga kauban sa trabaho sa Barangay San Luis,Gingoog City,Misamis Oriental.
Giila ni Ombudsman Samuel Martirez ang gipang-papha nga sila San Luis Punong Brgy Niño Stephen Quinto;Brgy Kagawads Manuel Beronilla ingon man si Agustina Gabac;SK chairman Cyrange Jay Rosil ug SB Secretary Christopher Dionne Castino nga pulos nagpuyo sa Gingoog City.
Subay ni Ombudsman graft investigator-prosecution officer 3 Nelson Edralin nga nagsumikad ang silot tungod sa reklamo nila Alexander Mandamiento;Harry Don Reyes;Joel Salvani ug Rosalina Paylango diin pipila niini mga pinili gihapon sa barangay.
Nakit-an sa Ombudsman nga sad-an ang mga sinumbong sa kasupakan sa serious dishonesty aggravated by grave misconduct ug falsification of public or official documents subay sa giduso nga reklamo sa complainants.
Nagsumikad ang reklamo sa complainants subay sa ilang panaghap nga ilegal ang pagkatudlo ni Quinto kang Paylangco (Rosita) isip tresurero ug gitugtan nga maka-bank withdrawals sa pondo bisan dunay pag-kuwestiyon gikan sa grupo ni Mandamiento.
Kini ang rason nga miduso’g kasong pagsupak sa section 3 (a) ug (e) sa Anti- Graft and Corrupt Pratices Act didto sa Ombudsman sila Mandamiento batok sa grupo ni Quinto sa tuig 2018.
Apan dili lig-on ang mga ebedensiya nga na-presentar sa complainants rason nga nabasura pero subli nabuksan tungod sa nakit-ang mga sirkumstansiya sa Ombudsman rason gipaboran ang motion for reconsideration.
Pabiling wala mabarugi sa complainants ang alegasyon sa pagsupak sa Republic Act 3019 o Anti- Graft and Corrupt Pratices Act apan naigo gihapon ang grupo ni Quinto sa laing aspeto sa kasong administratibo.
Nasapon sila sa Ombudsman nga nakahimo’g serious dishonesty aggravated by grave misconduct ug falsification of public or official documents hinungdan nga gipangtangtang sa trabaho isip barangay government officials.
Samtang si Paylango (Rosita) ang na-absuwelto sa mga kaso kay walay igong mga basehan ang mga nanunumbong batok kaniya.
Dugtong niini,gimanduan sa Ombudsman si Gingoog City Mayor Eric Cañosa nga ipatuman ang mando sulod sa napulo ka adlaw gikan sa pagkadawat sa kopya sa desisyon sa kaso.
Nalatid usab sa mando nga ma-forfeit ang retirement benefits sa maong respondents;diskuwalipikado na pagkupot sa bisan unsa nga posisyon sulod sa gobierno;kanselado ang ilang civil service eligibility ug gidid-an makakuha sa pasulit-serbisyong sibil.
Apan kini nga hukom mahimo pang ma-apelar sa mga sinumbong aron wad-a’g bili ug makakuha sa temporary restraining order hangtod writ of preliminary injuction sa Court of Appeals.
