CAGAYAN DE ORO CITY – Gitin-aw ni Nazareth Brgy Kapitan Janjan Rodriguez nga dili pamulitika apan pagsuporta sa panawagan sa medical frontliners ang petisyon nga nag-awhag kang City Mayor Oscar Moreno nga ipaubos sa enhanced community quarantine o ECQ ang syudad.
Kini human anaa sa halos 30 ka brgy kapitan ang giingong mipirma sa petisyon alang sa maong katuyuan.
Miingon si Rodriguez nga gikapoy ug naglisod na sila sa pagpangita’g ayuda nga mahatag sa mga residente rason nga gihangyo nila si Moreno niini.
Dugang ni Rodriguez nga dili angayang ikasakit ni Moreno ang petisyon tungod kay igo lamang sila nagsuporta sa hangyo sa mga doktors ug nurses aron malikayan ang pagkaylap sa virus.
Samtang gipamugos ni ABC President Alam Lim nga walay kamatooran ang petisyon sa 26 ka kapitan sa nga nanawagan sa deklarasyon nga enhanced community quarantine ngadto kang City Mayor Oscar Moreno.
Miingon si Lim nga gipanghimakak sa mga brgy kapitan nga sila kabahin sa mipirma sa petisyon.Dugtong niini, nanawagan ang presidente sa Liga ng mga Kapitan nga magtinabangay sa pagbatok sa Covid-19 ug undangon ang pamulitika.
Kabahin sa brgy kapitanes nga mipirma sa petisyon ang giingong gikan Nazareth,Barangay 1,Macasandig,Puerto, Lapasan, Macabalan, Kauswagan, Bayabas, Bonbon, Balulang, Consolacion, Barangay 15, Barangay 5, Barangay 16,Barangay 26, Barangay 31, Barangay 36, Barangay 33, Bulua, Barangay 2, Barangay 12, Barangay 23, Barangay 30, Barangay 38, Barangay 34, ug SanSimon.
Samtang walay bili alang kang Moreno ang pirmado nga petisyon sa 26 ka kapitanes nga nanawagan sa deklarasyon sa enhanced community quarantine o ECQ sa pagbatok sa Covid-19.
Pabilin nga gibarugan ni Moreno ang iyang hukom nga dili ipaubos sa ECQ ang syudad gumikan sa iyang rason nga maapektuhan ang mga kabus ug ang ekonomiya sa syudad.
Siya miingon nga layo na’g naabtan ang dakbayannga walay deklarasyon nga ECQ.
Gani,gipasigarbo niini nga tungod sa iyang gihimo wala maparalisar ang ekonomiya sukwahi sa ubang lugar.
Una nang nagtoo ang alkalde sa syudad nga klaro nga pamulitika ang gihimo sa mga kapitan nga supak sa iyang administrasyon.
