CAGAYAN DE ORO CITY – Nasikop sa search warrant operation sa PDEA-10 ang high value target o HVT nga aktibong konsehal diha sa Brgy Iponan ning syudad.
Giila ni PDEA Agent X ang suspek nga si Iponan Brgy Kagawad Redeem Dablio,55 anyos nga nagpuyo sa Zone 3 sa maong dakbayan.
Nakuha gikan sa suspek ang pito ka gramo sa suspected shabu nga balor 50-mil pesos ug drug paraphernalia dihang nasulod sa PDEA operatives sa maong pinuy-anan niini.
Gibutyag ni PDEA agent X nga tuig 2018 pa nila na-monitor ang kalihukan ni Dablio apan karong adlawa lamang nila hingpit nakuha.
Kasuhan sa pagbaligya’g ilegal nga droga ang suspek sa piskalya ning syudad sunod semana.
Samtang gihimakak ni Dablio ang pasangil nga PDEA-10 nga namaligya ug naggamit siya’g ilegal nga droga.
Kini bisan nga nakuhaan sa gitoohang shabu si Dablio dihang gipaubos sa operasyon sulod sa pinuy-anan niini.
Miingon si Dablio nga tinood nga naggamit kini sa ilegal nga droga apan dugay nang miundang.
Si Dablio ang kanhi trabahante usab sa korte ning syudad sa wala pa mosulod sa politika ning tuiga.
