CAGAYAN DE ORO CITY-Paningkamutan sa City Health Office nga dili na madugangan pa ang ihap sa namatay sa dengue sa tibook syudad.
Gikumpirmar ni city health officer Dr Fe C. Bongcas nga anaa na sa unom ka tawo ang namatay human mapaakan sa lamok nga nagdala og dengue.
Apan bisan paman niini, nanawagan siya sa publiko nga dili mag-panic ug mahadlok inay magbinantayon aron dili mapaakan sa lamok.
Gitutokan nila karon ang Barangay Lapasan tungod kay nagbaton sila sa daghang kaso sa sakit nga dengue.
Matud ni city health officer Dr Fe C. Bongcas nga ilang gilibot ang pipila ka lugar nga apektado sa maong sakit ug ilang nasuta nga adunay stagnant water nga maoy gitambayan sa mga lamok.
Hisayran nga nagpahigayon na sila sa ikaduhang pag-fogging sa maong dapit aron malikayan ang pagdaghan sa susama nga kaso.
Giawhag usab niini ang mga residente nga i-mintinar ang kalimpyo sa palibot.
