CAGAYAN DE ORO CITY- Nakuha sa mga partisipante sa Brgy Macabalan ang kampeonato sa “Carnival Street Parade 2019” nga gipahigayon kagahapong adlawa.
Napukan sa maong barangay ang 13 ka contingents nga misalmot sa maong showdown.
Nadawat nga papremyo sa Brgy Macabalan ang P150,000 isip 1st prize winner; gisundan sa Barangay Bugo kinsa midawat sa P90,000 isip 2nd prize winner samtang gidawat sa Patag National High School ang P75,000 nga premyo isip 3rd prize winner.
Giila usab nga Carnival King, ang partisipante gikan sa Brgy Bugo samtang ang Carnival Queen ang naggikan sa Brgy Macabalan.
Una nang gibutyag sa trainor sa Brgy Bugo nga si Webster Sabunod nga dili kini ang unang higayon nga midaug sila sa “Carnival Street Parade” ilabina nga defending champion sila sa miaging tuig.Ang Carnival Street Parade ang kabahin lamang sa pipila ka outdoor activities sa kasaulugan sa kapistahan ni Sr. San Agustin ning syudad sa Agosto 28.
Dugtong niini,gikalipay sa City Tourism Officer ang pagsaka sa ihap sa contingents nga moapil sa Civic Military Parade ugmang adlawa.
Miingon si City Tourism Officer head Chyza Dolguyme miingon nga nadugangan sa 26 ka contingents ang moapil sa parada diin gikan sa 112 ka contingents sa 2018, nahimo na kining 138 contingents ning tuiga.
Dugtong niini, nagpahimangno si Dolguyme sa partisipante nga posibleng molungtad sa tunga ka adlaw ang parada.
Gawas sa 138 ka contingents, moapil usab sa parada ang 11 ka floats.
Una nang gipahimangnuan ni Dolguyme ang mga tigulang,mabdos, adunay sakit ug mga bata nga dili na ipaapil sa parada.
