CAGAYAN DE ORO CITY – Napalig-on pa ang unang naduso nga balaodnon ni Misamis Oriental District 2 Congressman Bambi Emano sa miaging Hunyo nga nagtumong paghimong unom ka tuig sa termino sa mga brgy kapitanes ug mga konsehales sa kabarangayan sa nasud.
Kini human miani sa suporta sa mayoriya sa kamarabaha ang halos kaanggid nga balaodnon nga mismong gisang-at ni House Speaker Martin Romualdez diin gitaho niini sa mga punong brgy atol sa Liga ng Barangay national congress.
Kabahin sa nagpaluyo niini si Cagayan de Oro 1st District Cong. Lordan Suan diin iyang nakita nga ikaayo kini sa pagserbisyo sa kabarangayan kay tinud-anay nga daghang mahimo nga trabaho.
Gawas niini,makadaginot usab ang gobierno kon mahimong 6-years ang termino sa brgy officials ilabina nga pabiling mano-mano ang piliay alang kanila.
Samtang makatabang nga makahimo’g daghang trabaho alang sa sunod nga officials ang tinguha sa kamarabaha nga himoong unom ka tuig ang termino sa kapitanes ug mga konsehales sa kabarangayan sa nasud.
Kini ang gipalanog nga baruganan ni incumbent Brgy 40 Kapitan Alam Lim kinsa presidente usab sa Association of Brgy Council Cagayan de Oro sa sugyot balaodnon sa mga kongresista sa kauluhan.
Namahayag si Lim nga walay klaro nga trabaho nga mahimo ang brgy officials kon molungtad lang sa tulo ka tuig ang ilang pag-pondo sa kabarangayan.
Kini ang rason nga dako siya nga uyon bisan kon anaa na siya sa iyang katapusang termino sa katungdanan sa ilang brgy.
Sa pikas bahin,dili epektibo sa pang-gobyerno ug dugang gasto lang ang paglusad sa piliay sa lebel sa kabarangayan.
Kini ang reaksyon ni Citizens Watch for Good Governance 10 convenor Atty. Antonio Soriano sa sugyot-balaodnon sa liderato sa kamara nga himoon nang unom ka tuig ang termino sa matag-kapitan ug brgy konsehales.
Miingon si Soriano nga mas maayo nga itudlo na lang sa lingkod nga mayor ang magsilbing kapitanes ug mga konsehales aron igo paghuman sa termino niini,mabag-o na usab ang mopadagan sa matag-brgy.
Siya miingon nga sa kasamtangang kahimtang,dunay pipila ka kapitanes nga kulang sa kooperasyon kay dili tig-suportahan sa lingkod nga mayor sa usa ka lugar.
