Nagpadayon ang mga karaang hagit nga nasugat sa mga magtutudlo sa pag-abri sa Brigada Eskwela karong tuiga, sumala pa sa pamahayag ni Ruby Bernardo sa Alliance of Concerned Teachers Philippines.
Sa iyang interbyu sa Bombo Radyo siya miingon nga, daghan sa mga magtutudlo ang napugos sa paggasto gikan sa ilang kaugalingong bulsa aron matubag ang mga nagkalain-laing panginahanglanon ug pag-ayo sa mga pasilidad sa tunghaan.
Dugang niini, gipunting sa ilang gihimong survey nga moabot sa 75 porsyento sa mga magtutudlo ang nagkumpirma nga sila gayud ang nag-abaga sa maong mga galastuhan.
Gawas niini, nagpadayon usab ang reklamo mahitungod sa kakuwang sa mga classrooms, mga lingkoranan, ug mga gikinahanglan nga teaching materials.
Bisan pa man sa bug-os nga pag-implementar sa tulo ka term nga school calendar, gipahayag ni Bernardo nga nagpabilin lamang nga soft copy ang mga materyales nga gihatag sa DepEd ngadto kanila.
