CAGAYAN DE ORO CITY – Walay nakit-ang foul play ang kapolisan sa unang pakisusi nila sa patay’ng lawas sa 23 anyos nga parking boy nga dunay ka-live partner dihang nakit-an sulod sa balay sa higala niini sa Purok 2,Sitio Macapaya,Brgy Camaman-an ning syudad.
Giila ni Police Master Sgt Norbert Ian Zafra,imbestigador sa Cogon Police Station ang biktima nga si John Rey Dublado nga lumad taga-Ozamiz City,Misamis Occidental apan temporaryong nagpuyo sa syudad.
Sa pakisusi sa PNP,nasubo pag-ayo ang biktima kay giingong nakit-an niini ang iyang kaipong babaye nga dunay ikauban nga laing lalaki.
Kini ang rason nga milaag ug miduyog ang biktima sa pakig-inom apan wala sila magtoo nga nagkutlo sa kinabuhi pinaagi sa paghikot-pisi sa liog.
Gisugyot sa kapolisan nga ipaubos sa otopsiya ang patay’ng lawas aron masuta ang hinungdan sa kamatayon niini.
