CAGAYAN DE ORO CITY – Wala na’y tsansa nga mahitabo pa ang eleksyon sa brgy ug sangguniang kabataan sa nasud sa umaabot Disyembre 5 ning tuiga.
Kini human kompirmaha ni Cong. Rufus Rodriguez sa segundo distrito ning syudad nga may naduso na nga balaodnon nga nagtumong sa pag-oktaba sa pang-barangay nga piliay ning tuiga.
Gibutyag ni Rodriguez nga nagsilbi na lamang nga formality ang maong mga balaodnon human miuyon na niini si incoming House Speaker Martin Romualdez.
Gibutyag sa kongresista nga moduso usab kini sa iyang kaugalingong bersyon sa brgy-SK election postponement kay gusto niini nga sa Mayo ug dili Oktubre 2023 ipahigayon ang maong piliay.
Sa senado usab,miduso na si Sen Jinggoy Estrada sa balaodnon ng nagtumong pagsibog sa piliay sunod tuig.
Samtang gilapdan pa ni Commission on Elections 10 regional director Atty Reynato Magbutay ang information dessimination sa mga gusto magpa-rehistro aron makabotar sa brgy ug sk elections ning tuiga.
Kini bisan kon nagkakusog ang posibilidad nga wala na’y pang-barangay nga piliay gumikan sa kagustuhan sa mga magbabalaod nga masibog kini sunod tuig.
Gibutyag ni Magbutay nga trabaho nila ang preparasyon ug paglusad sa eleksyon hinungdang samtang wala pa’y balaod nga pirmado si Pres. Bongbong Marcos,magpabilin ang ilang kaandam alang niini.
