Gisugyot ni Barangay 23 Kapitan Jaime Joshua Frias II ang pagtan-aw sa duha ka bahin sa giplano nga pag-oktaba sa Barangay ug Sangguniang Kabataan Elections.
Matud pa sa maong opisyal, usa ka dakong pabor ug ganti ang term extension para sa mga nagtrabaho nga lideres apan usik lang sa panahon ug kalbaryo alang sa katawhan kung ang naghawod sa barangay walay nahimo o dili maayo mangalagad.
Gipahinumdoman usab niya ang mga residente nga dili angay mabalaka sa kalamboan tungod kay ang Department of the Interior and Local Government o DILG nagpatuman man ug mga lagda aron magpabiling masigpit ug maayo ang serbisyo bisan pa man madayon o mapakgang ang botasyon.
Gipasabot pa sa kapitan nga gikan pa sa nakalabay nga piniliay sa tuig 2013 ang maong baruganan ug ang katawhan gihapon ang adunay katapusang paghukom kung angay ba hatagan ug lugway ang ilang mga gipili nga opisyal.
