CAGAYAN DE ORO CITY – Gibarugan ni Misamis Oriental 2nd District Representative Bambi Emano nga ensakto ang kongreso sa pagpasar sa balaod aron basehan nga isibog ang brgy ug SK elections sa katapusang Lunes sa Oktubre sunod tuig.
Tubag kini sa kongresista sa pangutana sa Bombo Radyo kabahin sa giduso nga petisyon sa ilado nga election lawyer Romulo Macalintal sa Korte Suprema aron pugngan ang pagsibog sa piliay sa brgy.
Gihimo sa kongresista ang reaksyon dungan sa pagbukas sa congressional district office niini sa Balay Nenotchka sa lungsod sa Tagoloan ning lalawigan kagahapong adlawa.
Matigayon unta ang eleksyon sa kabarangayan sa Disyembre 5 ning tuiga apan gipasibog ni Pres Bongbong Marcos sa sunod tuig.
Samtang gihulat sa Commission on Elections ang ilugwa nga ruling sa petisyon ni election lawyer Romulo Macalintal diin nagtinguha sa pag-imbalinada sa balaod nga pirmado ni Pres Bongbong Marcos nga nagsibog sa brgy ug SK elections sa sunod tuig.
Kini human gimanduan na sa korte suprema ang nalambigit nga mga grupo nga moduso sa ilang position papers kon nganong angay o dili ihatag ang kagustuhan sa petitioner kabahin sa isyu.
Miingon si Misamis Oriental Provincial Election Supervisor Atty Carlito Ravelo nga kon molugwa’g temporary restraining order ang taas nga hukmanan,nagkahulugan kini nga dunay mahitabo nga piliay ning tuiga.
