CAGAYAN DE ORO CITY-Gitangtang sa Ombudsman tungod sa kasong administratibo si Vice Gov Bukidnon Rogelio Quiño.Kini tungod sa pagpasulod ni Quiño sa iyang mga paryente sa pagsilbing mayor sa lungsod sa Manolo Fortich,Bukidnon sa miaging katuigan.
Gibutyag ni Bukidnon DILG provincial director Bruce Colao nga hingpit napatuman ang mando sa Ombudsman tungod sa pagbalibad sa Court of Appeals o CA nga makakuha’g writ of preliminary injunction batok sa kamanduan.
Si Quiño ang gihulipan usab ni Board member Alex Calingasan kinsa kanhi na usab nahimong bise-gobenador sa Bukidnon sa miaging katuigan.
Samtang wala pa mawad-i’g paglaum ang mga alyado ug kaubang board members ni Quiño sa giatubang niya nga kaso didto sa Ombudsman.
Gibutyag ni Bukidnon 1st District board member Atty Jay Albarece nga nagpabilin pa ang petition ni Quiño aron kontrahon ang dismissal order gikan sa Ombudsman.
Si Albarece miingon nga mahimo pa nga dad-on ni Quiño ang kaso sa Korte Suprema kon dili mahatag sa Court of Appeals ang pagkontra sa mando sa Ombudsman.
Hisayrang si kanhi municipal Kag Ryder Detona ang nagduso’g kasong grave misconduct kang Quiño diin gihukman usab sa Ombudsman tuig 2016 pa.
