CAGAYAN DE ORO CITY – Gi-depensa sa kadagkuan sa Cyrstal Sugar Milling Company ang pagbaton nila sa 390-mil ka sako sa mga asukal sulod sa lima ka warehouses niini sa Brgy North Poblacion,Maramag,Bukidnon.
Kini human una sila nga gisudlan sa mga opisyal sa Bureau of Customs-Manila ug representasyon sa Sugar Regulatory Administration kon wala ba’y gipangtaguan nga mga asukal.
Gibutyag ni Javier Saggabarria,vice president of administration sa kompanya nga 66 porsiento sa maong mga asukal ang gipang-iya sa mismong planters nga nagpagaling sa ilang mga tubo samtang laing 34 percent lang ang ilaha ug maoy ilang gibaligya.
Siya miingon nga dakong bakak ang isyu nga nanago sila’g mga asukal kay ang mga sinako nga nakit-an sa taga-BoC ug SRA ang halos napalit na sa sugar traders nga wala pa lamang nakuha.
Gipasabot usab niini nga hinay-hinayon nila ang pagbaligya sa nabiling mga asukal sanglit petsa 7 pa sa Nobyembre ning tuiga ang pag-ani sa mga tubo aron ipaubos sa pagpagaling.
