CAGAYAN DE ORO CITY – Naka- modified enhanced community quarantine o ECQ ang katawhan nga sakop sa lungsod sa Talakag,Bukidnon.
Kini human kompirmaha sa DoH -10 ang ikapito nga pasyente nga usa ka OFW gikan sa Kuwait nga positibo sa COVID-19 delta variant.
Miingon si Talakag Mayor Vergito Factura nga hinoon,gilayong na-isolate ang siyam ka direct contacts sa maong babayeng biktima ug pulos sila gipahimutang sa DoH-10 facility ning syudad.
Ang maong pasyente ang nadugang sa unang lima gikan sa Cagayan de Oro ug laing usa sa Gingoog City,Misamis Oriental nga natakdan sa delta variant.
Samtang sa pikas bahin,limitado apan makalahutay sa pipila ka semana ang panudlanan sa kagamhanang probinsyal kon tugtan sa IATF-national nga ipaubos sa enhanced community quarantine ang Misamis Oriental.
Kini ang pagpasabot ni Provincial Gov Bambi Emano kon hisgutan sa pangutana kon may kapas ba ang probinsya sa pagpakaon sa katawhan kon naka-ECQ masiguro lamang nga malimitahan ang dugang transmisyon sa COVID-19 delta variant nga miigo na sa Cagayan de Oro,Gingoog ug Talakag,Bukidnon.
Miingon ang gobernador nga anaa sa 90 porsiento nga preparado ang kalungsuran nga batukan ang pagsulod sa delta variant sa lalawigan.
Una niini,istriko nga gimando ni City Mayor Oscar Moreno nga dili ihatag ang Johnson & Johnson nga bakuna ngadto sa laing priority sector apan gawas lamang sa A2 ingon man A3 o sa senior citizens ug mga tawo nga naghambin nang daan sa balatian.
Gihimo sa mayor ang kamanduan human nakaabot kaniya nga bisan ang kategorya sa A4 ang buot usab mo-avail sa maong klase sa bakuna.
Miingon si Moreno nga wala gipadala ni Philippine Vaccine Czar Sec Carlito Galvez Jr ang J & J vaccines aron ihatag kang bisan kinsa apan ngadto sa mga edaran ug kadtong dunay comorbities nga sektor lamang.
