Gipasalig sa kapulisan sa dakbayan nga makanunayon ang ilang police visibility sa mga eskwelahan sugod pa sa Brigada Eskwela, samtang kasamtangan pang gipailalom sa mas lawom nga imbestigasyon ang mga video nga mikatag sa social media nga nagpakita og armas ug mga hulga sa mga tunghaan sa dakbayan.
Sa iyang eklusibong interbyu sa Bombo Radyo, gihupay ni Bulua Police Station Commander PMaj. Rutherford T. Ondin ang kabalaka sa mga ginikanan ug estudyante sa Bulua National High School kalabot sa mikatag nga bahad sa usa ka menor de edad nga mamusil.
Samtang gipasabot niya nga daan na nga gipahugot ang seguridad sa mga tunghaan sa syudad ubos sa direktiba ni City Director Police Colonel Dexter Paje uban sa mga force multiplier ug mga barangay tanod sa nagkalain-laing dagkong tunghaan sa syudad.
Hinuon, gipadayag usab niya nga dili lang ang Bulua National High School ang gilangkob sa maong viral post, kundi apil na usab ang ubang mga tunghaan sa rehiyon.
Busa hingpit na nga gipaubos sa mas lawom nga imbestigasyon ang mga nahisgutang video aron mapasakaan og saktong kaso ang mga tawong nagpaluyo sa paghatag og fake news ug pagpaburot sa maong mga video nga nakahatag og kakuyaw sa mga tunghaan sa syudad. –
