Taliwala sa mikatag nga bahad sa pagpamusil sa mga tunghaan sa dakbayan, gihatagan og gibug-aton ni Bulua Punong Barangay Al Legaspi Jr. ang makanunayong pag-check sa mga bag sa mga tinun-an usa pa sila makasulod sa eskwelahan.
Matod pa niya, kinahanglan gyud nga himoon ang maong pag-inspeksyon aron masiguro nga walay makalusot nga mga kontrabando o gidili ug delikadong butang sulod sa mga tunghaan.
Samtang gipasabot usab niya nga sama sa Bulua National High School, dili lang mga residente sa barangay ang magsulod-gawas sa mga eskwelahan apan lakip usab ang mga taga laing lugar.
Busa nanawagan siya sa tanan nga magpabiling mabinantayon ug magtinabangay aron maprotektahan ang kahapsay ug kaluwasan sa mga estudyante ug mga magtutudlo.
